سورة الضحى

سورة الضحى

سورة الضحى

أوقات انت بتبقى عمال تدعي ربنا بحاجة معينة وما تتحققش .. فإما انت بتدعي بحاجة غير منطقية أو بحاجة هتبقى فيها ضرر ليك وتحمد ربنا إنها ما اتحققتش بعد كده لما تيجي تبص على الموقف من بعيد ، حاجة غير منطقية زي واحد مثلاً كان بيدعي ربنا قدام الكعبة "يارب ابقى من العشرة المبشرين بالجنة" وعمال يكررها !!
ربك دايماً بيعملك اللي فيه صالحك وبيبعد عنك كل شر .. والمشكلة إننا بنركز في اللي مش بيتحقق وبننسى النعم الكتير اللي غارقنين فيها وبنحتاج حاجة تفكرنا بالنعم ديه عشان نقول آآآه احنا الحمد لله أحسن من غيرنا كتير ،
ده أول هام ركز فيه بقه ونيجي لتاني هام .. إصحى للكلام.

النبي صلى الله عليه وسلم انقطع عنه الوحي فترة .. الأقوال بتقول ان الفترة ديه ما بين 3 أيام وحتى 40 يوم "فيها خلاف"
و ديه كانت بمثابة اختبار قوي للنبي لدرجة ان الكفار بدأوا يسخروا من النبي عليه أفضل الصلاة والسلام .. في منهم اللي قال : قد ودع محمد "قصدهم ربه" ، وفي اللي قال : ما أرى صاحبك الا قد قلاك "يعني كرهك واستغنى عنك".
فنزلت سورة الضحى.

معلومات عن سورة الضحى

سورة الضحى هى سورة مكية نزلت بعد سورة الفجر ، ترتيب سورة الضحى فى المصحف الشريف رقم 93 ، عدد آيات سورة الضحى 11 آية ، عدد كلمات سورة الضحى 40 كلمة ، عدد حروف سورة الضحى 164 حرف.
يدور محور سورة الضحى حول شخصية نبينا الحبيب صلى الله عليه وسلم وما حباه الله به من الفضل والإنعام فى الدنيا والآخرة ليشكر الله على تلك النعم الجليلة.

تفسير سورة الضحى

قال تعالى في سورة الضحى :
(وَالضُّحَى)
قسم من الله تعالى بساعة من ساعات النهار .. و ده يدل على عظم هذه الساعة.

(وَاللَّيْلِ إِذَا سَجَى)
قسم آخر من الله بدخول الليل وإستقرار ظلامه - كده ربنا أٌقسم مرتين - وطالما ربنا أقسم يبقى اللي جاي ماله ؟
اللي جاي مهم ونركز فيه "اصحى بقى مش كل مرة هاقولها".

(مَا وَدَّعَكَ رَبُّكَ وَمَا قَلَى)
ما تركك ربك يا محمد وما أبغضك.

(وَلَلْآخِرَةُ خَيْرٌ لَكَ مِنَ الْأُولَى)
وللدار الآخرة ، وما أعد الله لك فيها ، خير لك من الدار الدنيا وما فيها ، فلا تحزن على ما فاتك منها ، فإن الذي لك عند الله خير لك من الدنيا وما فيها .. من الآخر كده يومين ومروحين.

(وَلَسَوْفَ يُعْطِيكَ رَبُّكَ فَتَرْضَى)
ولسوف يعطيك يا محمد ربك في الآخرة من فواضل نعمه ، حتى ترضى.

(أَلَمْ يَجِدْكَ يَتِيمًا فَآوَى * وَوَجَدَكَ ضَالًّا فَهَدَى * وَوَجَدَكَ عَائِلًا فَأَغْنَى)
ربنا بيعدد نعمه على سيدنا محمد ﷺ و بيذكره بيها انه معاه من وهو طفل ومن قبل النبوة بأنه وجدك ربك يتيماً فجعل لك مأوى تأوي إليه ، ووجدك في قوم كفار فهداك عنهم واختارك من بينهم ، ووجدك فقيراً فأغناك.

(فَأَمَّا الْيَتِيمَ فَلَا تَقْهَرْ * وَأَمَّا السَّائِلَ فَلَا تَنْهَرْ)
وصايا من ربنا للنبي ولينا طبعاً بألا نظلم اليتيم ونستضعفه ونأكل حقه ، وإذا جاءك من يسألك صدقة فلا تنهره أو تتكبر عليه ولكن اطعمه و اقضي له حاجته.

(وَأَمَّا بِنِعْمَةِ رَبِّكَ فَحَدِّثْ)
من شكر النعمة أن تتحدث بها وأن تقول مَنَّ الله عليا بكذا وكذا .. عشان ما يدخلش لقلبك الغرور بما أنعم الله عليك فتنساه وتنسب الفضل لنفسك وذكاءك.

نربط بقه بين الهام الأولاني والتاني :
الاوقات اللي بتكون بتدعي بشئ و مش بيتحقق خلي إيمانك بربك قوي وإنه هيقدرلك الخير واللي يناسبك بس ، ولو أخر عنك شئ فإما هو شر ليك أو إختبار هتصبر عليه وتكون قده زي ما النبي عليه أفضل الصلاة والسلام صبر على سخرية الكفار ولا هتتوقف عن الدعاء وتبعد عن ربنا وتغضب زي العيال الصغيرة .. هتفتكر نعم ربنا عليك الموجودة فعلاً ولا هتركز في اللي إنت عايزه وبس ؟؟
ربنا يقدرلنا ولكم الخير كله ويرضينا بالقليل ويديم علينا نعمه وفضله علينا اللهم آمين.