تطبيق "ضايع - Daye3" يساعدك في استرجاع هاتفك المسروق

أبلكيشن أو تطبيق "ضايع - Daye3"

تطبيق ضايع Daye3

إذا تمت سرقة هاتفك المحمول أو التابلت أو جهاز اللاب توب الخاص بك وفقدت الأمل في إستعادتهم ، فحالياً أصبح هناك أمل لإسترجاعهم مرة أخرى ، وأيضاً إذا فقدت أغراضك الشخصية وأوراقك المهمة وكان من ضمنها بطاقتك الشخصية أو رخصة القيادة أو جواز سفرك فيمكنك إستعادتهم الآن بكل سهولة ، بالإضافة إلى الكاميرات وعدسات التصوير المفقودة ، كل هذا عن طريق تطبيق أو أبلكيشن "ضايع - Daye3"
انتشرت فى الآونة الأخيرة سرقة الموبايلات من الأشخاص أثناء سيرهم فى الطريق العام أو فى المواصلات العامة من خطف للموبايل أو الهاتف الخاص بهم أثناء استخدامهم عن طريق أشخاص على موتوسيكل أو توك توك .. إلى آخره ، وبتكون من خلال شخصين أو أكثر أحدهما السائق الذى يقود الموتوسيكل أو التوك توك أيا كان والآخر هو الخاطف الذى يخطف الموبايل أو الهاتف أو حتى حقيبة اليد الخاصة بالشخص البرئ أثناء سيره فى الشارع أو راكب ميكروباص أو أي وسيلة من وسائل المواصلات حتى فى مترو الأنفاق ، ولكن عن طريق أبلكيشن "ضايع - Daye3" للموبايل هيقدر يرجع الحاجات المسروقة ديه لأصحابها وهيقضي على سرقة الموبايلات واللابتوب وضياع الحقائب والأوراق المهمة مثل (بطاقتك الشخصية ، رخصة القيادة ، جواز السفر) وأيضاً الكاميرات المفقودة نهائياً بإذن الله

نبذة عن أبلكيشن أو تطبيق "ضايع - Daye3"

أبلكيشن Daye3 مش زي أي أبلكيشن خاص بتتبع لموقع الموبايل أو مكان الهاتف المسروق والكلام ده لإن ببساطة الحرامي أول ما بيسرق الموبايل بيعمله سوفت وير جديد وكل ده بيتمسح ، ولكن دور تطبيق Daye3 بيجي بعد مرحلة السوفت وير اللى عمله ، والجدير بالذكر ان السبب الرئيسي اللي بيخلي الحرامي يسرق الموبايل او اللاب توب إنه عارف أنه هيقدر يبيعها عند ناس معينة هو ممكن يكون بيتعامل معاهم أو هو نفسه يكون عنده محل موبايلات لبيع الموبايلات المستعملة (المسروقة) ، فكرة أبلكيشن Daye3 بتخليه ميعرفش يبيع الحاجات اللي سرقها نهائياً بس محتاجين أكبر عدد ممكن من المستخدمين وخاصة أصحاب محلات الموبايلات المستعملة ، و أي حد يجي يشتري الموبايل أو اللابتوب وكان مسروق الأبلكيشن هيعرفه إن الحاجه ديه مسروقة ويظهرلك إسم صاحب الموبايل المسروق و رقم تليفونه عشان تقدر تتواصل معاه ، كل ده من خلال رقم IMEI الخاص بهاتفك

ما هو رقم IMEI الخاص بجوالك أو هاتفك ؟

كل هاتف أو موبايل و ليه رقم IMEI خاص بيه و مفيش جهازين في العالم ليهم نفس الرقم IMEI علشان كده هنعتمد على الرقم ده ، هتلاقي في أبلكيشن Daye3 شرح كامل إزاي تجيب رقم IMEI حتى لو موبايلك اتسرق خلاص وكمان مش معاك الكرتونة أو علبة الموبايل الخاصة بيه

كيف أحصل على رقم IMEI الخاص بالموبايل أو الهاتف ؟

إتفقنا ان رقم IMEI الخاص بالموبايل فريد من نوعه لذلك نقوم بإستخدامه فى أبلكيشن Daye3 لإسترجاع الهواتف المسروقة ، ويمكن أن يوجد على كرتونة الموبايل أو علبة الهاتف رقمين (IMEI 1 - IMEI 2) ونحن سوف نستخدم أول رقم IMEI 1 فى أبلكيشن Daye3 ، وهناك عدة طرق للحصول على رقم IMEI الخاص بهاتفك :

1. تقوم بإستخدام الرمز الدولى المخصص لذلك (#06#*) "كود نجمة شباك صفر ستة شباك" تقوم بكتابته على شاشة الهاتف وكأنك تقوم بالإتصال وسوف يظهر لك رقم IMEI تلقائياً
2. إذا كان هاتفك أندرويد Android ، تقوم بعمل هذه الخطوات : تتوجه إلى قائمة الاعدادت (Settings) ، وتضغط على حول الهاتف التى تسمى (About phone) ، وتقوم بالضغط على الحالة (Status) ، سيظهر أمامك رقم IMEI
3. إذا كان هاتفك أي فون IPhone ، تقوم بعمل هذه الخطوات : تتوجه إلى قائمة الاعدادت (Settings) ، وتختار الاعدادات العامة (General) ، وتضغط على خيار حول الهاتف (About) ، وتضغط على IMEI وسوف يظهر الرقم أمامك

1. سوف تتفقد علبة الجهاز أو كرتونة الهاتف التى قمت بشرائها وسوف تجد رقم أو رقمين IMEI على العلبة نفسها
2. إذا لم تجد علبة الهاتف أو كرتونة الموبايل (فى حالة الأندرويد Android) ، سوف تستخدم أى جهاز كمبيوتر متصل بالإنترنت أو لاب توب وتقوم بالذهاب إلى لوحة تحكم جوجل (Google dashboard) ، وتقوم بتسجيل الدخول عن طريق حساب جوجل الذى كان مسجلاً على هاتفك المسروق ، وسوف تضغط على قائمة مكتوب عليها أندرويد (Android) لتفتح لك نافذة فيها معلومات جميع الأجهزة التى تم ربطها بهذا الحساب الخاص بجوجل ، وتضغط على العثور على أجهزتي (Find my devices) وسوف تظهر لك نافذة جديدة ستجد فيها إسم الجهاز مكتوب وإلى جانبه علامة تعجب (!) ، إذا ضغطت عليها سوف يظهر أمامك رقم IMEI
3. أما فى حالة الأي فون IPhone ولم تجد علبة الجهاز ، ستقوم بالدخول إلى حسابك على أي تونز iTunes ، وتقوم بالضغط على iPhone backup ، ستظهر لك نافذة فيها معلومات هاتفك ومن ضمنها ستجد رقم IMEI

أقسام أبلكيشن "ضايع - Daye3"

ينقسم تطبيق أو أبلكيشن Daye3 إلى 4 أقسام (Cameras and Lenses - National ID - Laptop - Mobile Phone)

أولاً : قسم الموبايل والتابلت Mobile Phone

ده هيبقى عبارة عن حاجتين :
بكل سهولة اللي اتسرق منه الموبايل هيدخل على التطبيق و هيسجل إن الهاتف ده مسروق منه و يكتب رقم IMEI و يسجل إسمه و رقم موبايل للتواصل معه عندما يتم العثور على هاتفه المسروق ، كما يتم كتابة كلمة مرور سيستخدمها في حالة رجوع الموبايل المسروق لإزالة بيانات الهاتف من على الأبلكيشن
المطلوب من أي شخص بيشتري موبايل مستعمل انه يفتح الأبلكيشن و هو بيشتري الموبايل و يبحث برقم IMEI الخاص بالموبايل المستعمل اللي بيشتريه - زى ما وضحنا قبل كده كيفية الحصول على رقم IMEI بكل الطرق سابقاً - لو الموبايل ده طلع مسروق هيظهر إسم صاحب التليفون المسروق و رقم تليفونه عشان تقدر تتواصل معاه و تعرفه و تبلغه ان الموبايل اللي اتسرق منه موجود فى المكان ده و عند الراجل ده
موضوع سرقة الموبايلات ده بالذات هنقدر نقضي عليه من خلال أبلكيشن Daye3 لو إتنفذ كالآتي :
كل واحد موبايله إتسرق منه يدخل يسجله على الأبلكيشن ، وكل واحد بيشتري موبايل مستعمل يدخل يبحث عنه الأول على الأبلكيشن قبل ما يشتريه ويتأكد إنه مش متسجل أو مش مسروق ، و بكده تبقى رجعت الموبايلات المسروقة لأصحابها بفضل أبلكيشن Daye3 وأصبح الحرامي ميعرفش يبيع الموبايل نهائياً وبالتالي مفيش دافع للسرقة تاني
لا تقم بإضافة رقم IMEI الخاص بهاتفك المحمول إذا لم يكن مسروقاً على سبيل التجربة لإنه بذلك يصبح الهاتف مسروقاً

ثانياً : قسم اللابتوب Laptop

لكل جهاز لاب توب رقم تسلسلي Serial Number خاص به ولا يمكن أن يتشابه اثنان في نفس الرقم ، نفس فكرة الموبايل بالظبط حيث ينقسم إلى قسمين أيضاً بس الفرق إنك هنا هتكتب الرقم التسلسلي Serial Number الخاص بجهاز اللاب توب ، كما هو موضح بالصورة ، وأيضاً هتلاقي في أبلكيشن Daye3 شرح كامل إزاي تجيب الرقم التسلسلي ده بالتفصيل

كيف أحصل على الرقم التسلسلي Serial Number الخاص باللاب توب ؟

هناك طرق عديدة تمكنك من معرفة الرقم التسلسلي Serial Number لجهاز اللابتوب وهى كالآتي :

1. فى أسفل جهاز اللاب توب يوجد لاصقة مدون عليها المعلومات والبيانات الخاصة بجهاز اللابتوب وهيكون من ضمنها الرقم التسلسلي Serial Number
2. من خلال PowerShell داخل الويندوز Windows ، ستقوم بفتح قائمة Start فى الويندوز وتختار Windows PowerShell وتستعرض أدواته ، ثم تضغط كليك يمين على الإختيار الأول وتختار تشغيل كمسؤول Run As Administrator ، وسوف تلاحظ ظهور شاشة ستقوم بكتابة هذا الأمر بها win32_bios I fl serialNumbergwmi وتضغط Enter وسوف يظهر لك الرقم التسلسلي Serial Number الخاص بجهازك اللابتوب

1. تستطيع الحصول على الرقم التسلسلي Serial Number من خلال كرتونة اللابتوب ستجده مكتوباً عليها

لا تقم بإضافة الرقم التسلسلي Serial Number الخاص بجهاز اللابتوب إذا لم يكن مسروقاً على سبيل التجربة لإنه بذلك يصبح مسروقاً

ثالثاً : قسم بطاقة الرقم القومى أو رخصة القيادة أو جواز السفر National ID

ناس كتير بيضيع منهم محفظة أو بطاقة أو أياً كان وفي نفس الوقت ناس تانية بتلاقي الحاجات ديه بس مبيعرفوش يوصلوها لأصحابهم وأكيد كلنا بنشوف البوستات ديه يومياً على الفيسبوك ، إحنا هنا عن طريق أبلكيشن Daye3 بنوصل الطرفين ببعض ، والموضوع هنا مش إنك ترجع البطاقة نفسها لأنك ممكن تروح تعمل واحدة جديدة ، الفكرة كلها لو كان معاك محفظة فيها أوراق مهمة مثلاً وفلوس وفي نفس الوقت فيها بطاقة أو رخصة قيادة - أى حاجة رقم قومي - هنا بقه انت هتستخدم (البطاقة - الرخصة - جواز السفر) في أبلكيشن Daye3 عشان ترجعلك حاجه تانية أهم وممكن متتعوضش
طريقة تنفيذ خطوات استعادة بطاقة الرقم القومى أو رخصة القيادة مثل خطوات استعادة الموبايل المسروق أو اللاب توب المسروق ، تنقسم لحاجتين :
هيدخل يسجل أنه فقد الحاجات ديه وهيكتب الرقم القومي والإسم ورقمه للتواصل كما يكتب كلمة مرور سيستخدمها في حالة حذفه للرقم القومي بعد ايجاده للأشياء المفقودة
كل اللي عليه أنه هيدخل يبحث بالرقم القومي وهيظهر قدامه رقم صاحب الحاجه ويتواصل معاه ويرجعله حاجته بدلاً من نشر هذه المفقودات على الانترنت
لا تقم بإضافة بطاقة الرقم القومي أو رخصة القيادة الخاصة بك إذا لم تكن مسروقه على سبيل التجربة لإنه بذلك تصبح مسروقه

رابعاً : قسم الكاميرات وعدسات التصوير Cameras and Lenses

هناك تحديثات يتم تنفيذها بإستمرار فى أبلكيشن Daye3 وفقاً لإقتراحات المستخدمين مثلاً بإضافة أقسام أخرى حيث أنه بالفعل تم إضافة قسم آخر إلى التطبيق وهو قسم الكاميرات وعدسات التصوير المفقودة Cameras and Lenses وطريقة إستخدامه أو تنفيذه فى إستعادة الكاميرات مثل طرق الأقسام السابقة والأبلكيشن وكافة الأقسام تحت التحديث والإضافات بشكل مستمر ونتمنى من المستخدمين إبداء إقتراحاتهم وإستفساراتهم فى أى وقت وبيتم مراعاتها والنظر فيها وإمكانية تنفيذها بإذن الله