منصة تجربة

سورة الغاشية

تفسير سورة الغاشية - منصة تجربة
سورة الغاشية
حضرتك عامل ايه ؟
- الحمد لله
و دماغك عاملة ايه ؟
- مش فاهم تقصدوا ايه يا منصة تجربة ؟؟ أنا أسمع عن .. انت عامل دماغ ايه ؟ لكن دماغك عاملة ايه ديه جديدة بصراحة.
في فرق يا عمنا اصحى للكلام
عامل دماغ ديه يعني مبلبع حاجة كده و لا كده .. ربنا يعافينا
أما دماغك عاملة ايه ؟ فا ديه حاجة تانية خالص .. امسك دماغك كده و نشوفها حتة حتة عاملة ايه :
- مخك ده عامل ايه ؟ مشغول بإيه يعني
مشغول بالخروجات والقهوة والصحاب والموضة المقطعة مرة و المتشمرة مرة ،
مشغول بالاغاني والحفلات و هنسافر فين الاجازة الجاية.
- عينيك ديه عاملة ايه ؟
بتسهر طول الليل على الانترنت من صفحة فلانة لصفحة علانة و فرجة على صور و فيديوهات ،
عينيك عمالة تتابع كل صورة على الانستجرام وصفحات شمال هنا وهناك ،
مشغولة بمتابعة الوز والبط والسحالي ولا مشغولة بإيه بالظبط ؟؟
- أذنك اللى هى ودانك يعني ديه عاملة ايه ؟
تعبانة من السماعات اللي بقت بلت إن فى ودانك بسبب طول اليوم أغاني شغالة ،
عمالة تسمع لكل من هب و دب بيجيب في سيرة الناس.
- بؤك ولسانك دول عاملين ايه ؟
شغال شتيمة ليل نهار و سب دين لكل أصحابك بسبب ومن غير سبب و يا بن و يا بن و اسمها بنهزر ،
عمال يجيب في سيرة طوب الارض و قلنا و قالوا ،
بترغى مع اللي حواليك بكلام يسم البدن وتعرف الناس مبتحبش ايه وتفضل تعيد وتزيد فيه زي الست اللتاتة.
- مناخيرك عاملة ايه ؟
يارب تكون بخير .. مش لاقيين ليها حاجة الصراحة غير لو بتشم مخدرات .. ربنا يعافينا جميعاً.

عرفت بقى دماغك عاملة ايه .. معناها ايه ؟؟
حدد بقى دماغك عاملة ايه عشان ما تزعلش في الآخرة
- هو انتوا كل حاجة هتقولولي في الآخرة ما بوراحة يا جدعان عليا
مش مصدق ؟!! طيب تعالى نشوف سورة الغاشية آية آية

معلومات عن سورة الغاشية

سورة الغاشية سورة مكية ، ترتيبها فى المصحف الشريف رقم 88 ، عدد آيات سورة الغاشية 26 آية ،
عدد كلمات سورة الغاشية 92 كلمة ، عدد حروف سورة الغاشية 378 حرف.
تعتبر سورة الغاشية من سور القران الكريم العميقة الهادئة التى تبعث إلى التأمل والتدبر والتطلع والرجاء ،
وإلى العمل ليوم الحساب.



تفسير سورة الغاشية

قال تعالى في سورة الغاشية :
(هَلْ أَتَاكَ حَدِيثُ الْغَاشِيَةِ)
حديث : خبر أو قصة .. الغاشية : القيامة و أهوالها من نار تغشى الناس و تلفح و جوه الكفار ،
فالمقصود ألم تعلم يا مُحمد عن القيامة و أهوالها و النار التي تلفح وجوه الكفار و تغشى الناس يومها.

(وُجُوهٌ يَوْمَئِذٍ خَاشِعَةٌ)
خاشعة : ذليلة ، وجوه أهل الكفر يومها ذليلة أمام المولى عز وجل.

(عَامِلَةٌ نَاصِبَةٌ)
أهي ديه الآية اللي كنا بنتكلم عنها فوق .. الوجوه اللي ما اشتغلتش في طاعة الله في الدنيا هتكون عاملة ومشغولة في الآخرة بالعذاب ، و ناصبة يعني هتكون الروؤس منتصبة واقفة مش هتعرف تنزلها ،
قال عنها الحسن (وجوه لم تعمل لله في الدنيا فأعملها الله في النار).

(تَصْلَى نَارًا حَامِيَةً * تُسْقَى مِنْ عَيْنٍ آنِيَةٍ)
هذه الوجوه جزاؤها نار حامية ، و شراب أصحاب هذه الوجوه من ماء أوقدت على جهنم منذ بدء الخلق ، و آنية يعني غليت حتى اقتربت من القاع "زي ما تيجي تغلي مياه و تنساها كده" قال عنها المفسرون لو نزلت منها قطرة على جبل لأذابته.

(لَيْسَ لَهُمْ طَعَامٌ إِلَّا مِنْ ضَرِيعٍ * لَا يُسْمِنُ وَلَا يُغْنِي مِنْ جُوعٍ)
أصحاب هذه الوجوه زي ما شربهم اتذكر في الآية السابقة فطعامهم اتذكر هنا وهو الضريع "قيل ان الضريع ده نبتة سامة موجودة في شبه الجزيرة العربية و قيل انها شجرة في النار و قيل انها الحجارة و قيل انها شوك من النار
"نسأل الله العفو والعافية" ، الضريع ده بقه مش هينفعهم فيخليهم يسمنوا ولا هيشبعهم اساساً.

(وُجُوهٌ يَوْمَئِذٍ نَاعِمَةٌ * لِسَعْيِهَا رَاضِيَةٌ * فِي جَنَّةٍ عَالِيَةٍ * لَا تَسْمَعُ فِيهَا لَاغِيَةً)
و ده بقى وصف أهل الجنة الوجوه اللي اجتهدت في طاعة الله و شغلت كل دماغها في العبادة و مش محتاجة أمثلة أقسم بالله انت عارف وأنا عارف إزاي نشغلها في طاعة الله ، و هذه الوجوه بسعيها في الدنيا في العبادة فهي راضية بجزاء ربها لها ، بجنة "عالية" لأن الجنة في عليين ، أهل الجنة دول مش هيسمعوا كلام باطل سواء سباب أو نميمة
أو أي كلام يؤذي السمع و السامع.

(فِيهَا عَيْنٌ جَارِيَةٌ * فِيهَا سُرُرٌ مَرْفُوعَةٌ * وَأَكْوَابٌ مَوْضُوعَةٌ * وَنَمَارِقُ مَصْفُوفَةٌ * وَزَرَابِيُّ مَبْثُوثَةٌ)
فيها عين ماء جارية عاذبة وأنهار من لبن و عسل و خمر ، فيها سرر أعلى هذه الأنهار "جنة تجري من تحتها الانهار" ،
أكواب موضوعة على حافة هذه الأنهار جاهزة لمن يحب أن يشرب منها ، و نمارق "مخدات و وسادات من الحرير" ،
مصفوفة "يعني محطوطة في شكل صفوف" لمن يحب أن يجلس و يتكئ ، وكلمة زرابي هي كلمة جمع زربية و ديه كلمة أصلها تُير إلى اذربيجان اللي اشتهرت بنعومة صوف أغنامها فكانوا بيعملوا منها فرش للأرض زي السجاد كده
و مبثوثة يعني منشورة و منتشرة في كل ركن (ايه الجمال ده .. ربنا يوعدنا يارب).

(أَفَلَا يَنْظُرُونَ إِلَى الْإِبِلِ كَيْفَ خُلِقَتْ * وَإِلَى السَّمَاءِ كَيْفَ رُفِعَتْ * وَإِلَى الْجِبَالِ كَيْفَ نُصِبَتْ * وَإِلَى الْأَرْضِ كَيْفَ سُطِحَتْ)
ربنا بيخاطب أهل العرب بلغة يفهموها و يتفكروا بما هو موجود حولهم فالإبل عندهم في كل مكان وفوقهم السماء وحولهم الجبال والأرض مسطحة من تحتهم .. ما فكرتوش من خلق كل هذه الخلائق من حولكم و صورها فأحسن صورها.

(فَذَكِّرْ إِنَّمَا أَنْتَ مُذَكِّرٌ * لَسْتَ عَلَيْهِمْ بِمُصَيْطِرٍ * إِلَّا مَنْ تَوَلَّى وَكَفَرَ * فَيُعَذِّبُهُ اللَّهُ الْعَذَابَ الْأَكْبَرَ)
فذكر يا مُحمد عبادي فإني أرسلتك إليهم للتذكير بآياتي ، وأعلم انك لست عليهم بجبار فتجبرهم على ما تريد ،
أما بقه اللي هيتولى عنك بعد ما تذكره ويكفر بها فعذابه عند الله شديد.

(إِنَّ إِلَيْنَا إِيَابَهُمْ * ثُمَّ إِنَّ عَلَيْنَا حِسَابَهُمْ)
إن جميع الخلق سيعودون جميعاً لله كما خلقهم أول مرة وعندها سيحاسبهم المولى ويجازيهم عما بدر منهم
سواء خيراً أو شراً "سلم يارب".

هااااا دماغك عاملة ايه بقه دلوقتى ؟؟؟

بقلم: صالح


تفسير السور القرآنية الأخرى على منصة تجربة

01 - سورة الفاتحة

78 - سورة النبأ

79 - سورة النازعات

80 - سورة عبس

81 - سورة التكوير

82 - سورة الانفطار

83 - سورة المطففين

84 - سورة الانشقاق

85 - سورة البروج

86 - سورة الطارق

87 - سورة الأعلى

89 - سورة الفجر

90 - سورة البلد

91 - سورة الشمس

ليست هناك تعليقات