القائمة الرئيسية

الصفحات

سورة الزلزلة

تفسير سورة الزلزلة على منصة تجربة
سورة الزلزلة
مرة وأنا طفل (6 سنوات) كنت رجعت البيت من المدرسة على بعد الظهر كده و بينما كنت أتجول في البيت مرتدياً الأندر وير (الفانلة و منافعها قبل اختراع البوكسر) وأستقر بيا الحال وأنا واقف في البلكونة و كنا وقتها ساكنين في الدور السادس .. إذ فجأة ألاقي العمارة بترقص رايحة جاية و هوب الناس في الشارع عمالة تصرخ و كله بيجري و العبد لله ميت من الضحك على مناظرهم
هوب مرة تانية ألاقي الحاجة (الله يبارك لها) شالتني و حدفتني قدام باب الشقة عشان ننزل جري "أمي بقه مقدرش أتكلم" وأنا بجري افتكرت إني تقريباً مش لابس هدومي كلها فوقفت في نص السلم و قفلت الطريق لكل اللي ورايا .. راح واحد جارنا الله يسامحه اداني شلوط محترم ولا كأنه شوبير فخدت السلم فوريرة و جيت في المدخل وقفت و مستحيل أخرج وماما تشد فيا وأنا أقولها أخرج إزاي كده و أعيييييط .. و إذ بيا ألاقي الشارع كله تقريباً والجيران والحبايب كله نازل و كله قالع يا معلم ، كله ملط من الكبير للصغير و من كل الأجناس والأعمار .. ساعتها عرفت إني كنت أكتر واحد مستور
بس هي العمارة كانت بترقص ليه والناس بتصرخ ليه ؟!
سمعت الكبار وقتها بيقولوا ده زلزال و إحتمال يتكرر فمحدش يطلع البيت أحسن يقع
زلزال !! يعني ايه زلزال ؟؟ (كان زلزال 92)
و بما إني طفل 6 سنوات و كل حياتي مازنجر و ماهر .. قولت ده أكيد وحش هو سبب إن العمارات تتحرك من مكانها أو حيوان بيتحرك على البيوت بيخليها تتحرك ... خيال عيال مفيش كلام
لحد ما فهمت بعد شرح طويل و عميق ان الأرض اللي إحنا والبيوت واقفين عليها هي نفسها اللي بتتهز .. فالفكرة نفسها بالنسبة لي كانت مرعبة
بس تأمل كده معايا المسخرة اللي حصلت فوق .. ان أول لما حصل الزلزال كله جري و خاف على نفسه و في ناس نزلت عريانة فعلا إلا من رحم ربي بسبب انه خايف ، أومال في يوم القيامة هنعمل إيه (ربنا يسترها علينا)

معلومات عن سورة الزلزلة

سورة الزلزلة سورة مدنية ، ترتيب سورة الزلزلة فى المصحف الشريف رقم 99 ، عدد آيات سورة الزلزلة 8 آيات ،
عدد كلمات سورة الزلزلة 36 كلمة ، عدد حروف سورة الزلزلة 156 حرف.
يقال عن سورة الزلزلة فى موقع ويكيبيديا إنها هزة عنيفة للقلوب الغافلة ، هزة يشترك فيها الموضوع والمشهد والإيقاع اللفظي ، وصيحة قوية مزلزلة للأرض ومن عليها ، فما يكادون يفيقون حتى يواجههم الحساب والوزن والجزاء في بضع فقرات قصار.

فضل سورة الزلزلة

سورة الزلزلة لها أفضال كثيرة ، روى الترمذي عن أنس بن مالك قال : قال رسول الله ﷺ : "من قرأ إذا زلزلت عدلت له بنصف القرآن ومن قرأ قل يا أيها الكافرون عدلت له بربع القرآن ومن قرأ قل هو الله أحد عدلت له بثلث القرآن" ،
و روي عن علي بن أبي طالب رضي الله عنه قال : قال رسول الله ﷺ : "من قرأ إذا زلزلت أربع مرات كان كمن قرأ القرآن كله" ،
و روى عبد الله بن عمرو بن العاص قال : "لما نزلت إذا زلزلت الأرض زلزالها بكى أبو بكر فقال النبي : ما يبكيك يا أبا بكر قال : أبكاني هذه السورة فقال النبي : لولا أنكم تخطئون وتذنبون ويغفر الله لكم لخلق أمة يخطئون ويذنبون ويغفر لهم إنه هو الغفور الرحيم"

تفسير سورة الزلزلة

قال تعالى في سورة الزلزلة :
(إِذَا زُلْزِلَتِ الْأَرْضُ زِلْزَالَهَا)
إذا اهتزت الأرض إهتزازاً شديداً لقيام الساعة

بس خدت بالك من كلمة زلزالها ديه .. أومال اللي قبل كده ده كان ايه .. زلزال 92 و تسونامي دول كانوا ايه ؟!
تحس إنهم مكنوش زلزال أصلاً .. سلم يارب

(وَأَخْرَجَتِ الْأَرْضُ أَثْقَالَهَا)
وأخرجت الأرض ما في بطنها من الموتى أحياء

(وَقَالَ الْإِنْسَانُ مَا لَهَا)
وقال الناس وخصوصاً الكفار مال الأرض و إيه اللي بيحصل لها (و ده إنكاراً منهم لوجود يوم القيامة و علاماته)

(يَوْمَئِذٍ تُحَدِّثُ أَخْبَارَهَا)
يومها الأرض ستتكلم و ترد على من يسأل عن إهتزازها و زلزلتها ،
و في قول آخر إنها ستخبر الناس بما فعلوا عليها من خير و شر

(بِأَنَّ رَبَّكَ أَوْحَى لَهَا)
هترد الأرض و تقول انها تهتز بأمر و وحي من الله لقيام الساعة وإخراجها ما في بطنها من الموتى إلى ظاهر الأرض ،
و في القول التاني برضو هتقول ما فُعل عليها من خير و شر بوحي و أمر من الله

(يَوْمَئِذٍ يَصْدُرُ النَّاسُ أَشْتَاتًا لِيُرَوْا أَعْمَالَهُمْ)
يومها يتفرق الناس إلى اليمين و اليسار ليروا نتائج أعمالهم في الدنيا سواء جنة أو نار و العياذ بالله

(فَمَنْ يَعْمَلْ مِثْقَالَ ذَرَّةٍ خَيْرًا يَرَهُ * وَمَنْ يَعْمَلْ مِثْقَالَ ذَرَّةٍ شَرًّا يَرَهُ)
الآية ديه نزلت في رجلين .. واحد كان بيأتيه السائل فيعطيه من الخير و يقول "إنما نؤجر على ما نعطي و نحن نحبه" ،
أما الثاني فكان بيتهاون بالذنب اليسير كالكذبة والغيبة والنظرة و يظن أنه لن يُحاسب عليها و كان بيقول "إنما أوعد الله بالنار على الكبائر" .. فنزلت الآيتين دول لتخبرنا أننا سنُحاسب على الذرة من أفعالنا سواء بالخير أو بالشر
"قبل اكتشاف الذرة اساساً"
آخر آيتين دول من سورة الزلزلة في غاية العظمة ،
الأولى : تخليك لا تقنط أبداً من رحمة الله
والتانية : ترعبك لأنك هتتحاسب على الذرة .. عارفها ؟! الذرة التي لا تُرى بالعين المجردة ديه

تفسير السور القرآنية على منصة تجربة

01 - سورة الفاتحة               78 - سورة النبأ
79 - سورة النازعات             80 - سورة عبس
81 - سورة التكوير                82 - سورة الانفطار
83 - سورة المطففين         84 - سورة الانشقاق
85 - سورة البروج                86 - سورة الطارق
87 - سورة الأعلى                88 - سورة الغاشية
89 - سورة الفجر                 90 - سورة البلد
91 - سورة الشمس            92 - سورة الليل
93 - سورة الضحى               94 - سورة الشرح
95 - سورة التين                 96 - سورة العلق
97 - سورة القدر                 98 - سورة البينة
100 - سورة العاديات         101 - سورة القارعة
102 - سورة التكاثر             103 - سورة العصر
104 - سورة الهُمزة            105 - سورة الفيل
106 - سورة قريش             107 - سورة الماعون
108 - سورة الكوثر              109 - سورة الكافرون
110 - سورة النصر               111 - سورة المسد
112 - سورة الإخلاص          113 - سورة الفلق
114 - سورة الناس
هل أعجبك المقال :

تعليقات

محتويات المقال