القائمة الرئيسية

الصفحات

سورة القدر

تفسير سورة القدر على منصة تجربة
سورة القدر
من عاداتنا السيئة الفهلوة !!
بنحب نبقى فهلويين في كل حاجة .. حتى العبادة ؟!
من مواسم الفهلوة رمضان و ده بيتلاحظ في كذا حاجه
- بنطلع المصحف من مكانه اللي اتحط فيه من رمضان اللي فات و ننفخ التراب من عليه
- أول فجر في رمضان تلاقي المسجد ولا كأنها صلاة الجمعة و ممكن ناس تصلي في الشارع كمان
- أول يوم تراويح لو انت من أهل المسجد ممكن تروح ما تلاقيش مكان أساساً
- و يبتدي العدد يقل بعد مرور 3 أو 4 أيام من رمضان - أما المسلسلات تشد حيلها - واخدلي بالك !!
لحد ما تقريباً يوصل للعدد الطبيعي للمسجد على نص رمضان
- هوب تتفاجئ في يوم ان المسجد اتملى تاني .. تعرف كده إننا بدأنا العشرة الآواخر من غير ما تفكر
والليالي الوترية بالذات بتبقى زحمة والزوجية إلى حد ما فيها مصليين
- لكن بقه ليلة الـ 27 .. يا اختاااااااااي مش هتلاقي أصلاً مسجد فاضي .. كله Full Complete ، ده ف مساجد أقسم بالله بتقفل الباب من صلاة الظهر و تفرش في الشارع للمصلين من كتر ما المسجد مافيهوش موضع لقدم

** طب اشمعنى ليلة الـ 27 ؟!
- عشان في ناس بتعتقد إنها ليلة القدر
للي ميعرفش أهميتها .. ليلة القدر ديه هي ليلة نزول القرآن .. والقرآن نزل كله جملة واحدة في الليلة ديه في السماء الدنيا و نزل بعد كده متقطعاً لمدة 23 سنة على النبي ﷺ حسب المواقف والأحداث أثناء فترة الدعوة ، كل آية في موضعها حتى نهايته
** طب اشمعنى برضه ليلة القدر ما تاخدنيش في الكلام ؟!
- لأن ليلة القدر ربنا اختصها بثواب الطاعات والأعمال الصالحة فيها سواء صيام ، قيام ، وكافة الأعمال الصالحة بأنها خير من عمل 1000 شهر .. حلو كده
و كمان قال عنها النبي ﷺ "من قام ليلة القدر إيماناً وإحتساباً غُفر له ما تقدم من ذنبه"
- بحسبة صغيرة كده تقسم الـ 1000 على 12 شهر = 83 سنة و كسور
** طب ليه 1000 شهر ؟! ليه مش 2000 و ليه مش 500 ؟!
- لأن النبي ﷺ كان بيحكي للصحابة عن واحد من بني اسرائيل ، انه لبس السلاح في سبيل الله ألف شهر .. فتعجب الصحابة بشدة من الموقف ده .. فنزلت سورة القدر لتؤكد أن العمل الصالح فيه خير وأفضل من فعل رجل بني اسرائيل

معلومات عن سورة القدر

سورة القدر هي سورة مكية ، ترتيب سورة القدر فى المصحف الشريف رقم 97 ، عدد آيات سورة القدر 5 آيات ، عدد كلمات سورة القدر 30 كلمة ، عدد حروف سورة القدر 114 حرف.
وفقاً لموقع ويكيبيديا ، تتحدث سورة القدر عن تلك الليلة الموعودة المشهودة التي سجلها الوجود كله في فرح وغبطة وابتهال ، ليلة الاتصال المطلق بين الأرض والملأ الأعلى ، ليلة بدء نزول القرآن على قلب محمد ﷺ ذلك الحدث العظيم الذي لم تشهد الأرض مثله في عظمته وفي حياة البشرية جميعاً.

تفسير سورة القدر

قال تعالى فى سورة القدر :
(إِنَّا أَنْزَلْنَاهُ فِي لَيْلَةِ الْقَدْرِ)
إنا "المقصود به الله سبحانه وتعالى" أنزلنا القرآن في ليلة القدر من شهر رمضان

(وَمَا أَدْرَاكَ مَا لَيْلَةُ الْقَدْرِ)
وما أعلمك يا مُحمد ما فضل ليلة القدر وما شرفها ؟

(لَيْلَةُ الْقَدْرِ خَيْرٌ مِنْ أَلْفِ شَهْرٍ)
خير هذه الليلة أفضل من عبادة ألف شهر .. انت متخيل يا مان !!

(تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِمْ مِنْ كُلِّ أَمْرٍ)
تتنزل الملائكة والروح بإذن ربهم من أجل تدبير كل أمر من أمور الدنيا وتعيين وتقدير كل خير وبركة و رزق وحياة وموت وغير ذلك مما سيقع في السنة القادمة كما قدرها الملك جل و علا (خدت بالك من بإذن ربهم ديه .. مش بمزاجهم يعني .. أكد على ديه أوي (و الروح هنا يُقال انه جبريل و يُقال انه مخلوق عظيم يفوق الملائكة (فيها خلاف من الاخر ما تشغلش بالك)

(سَلَامٌ هِيَ حَتَّى مَطْلَعِ الْفَجْرِ)
ليلة مفعمة بالسلام والأمن حتى الصباح ، فهي سلام كلها لا شر ولا كيد ولا حرمان فيها ، بل هي مملؤة بالنور والرحمة والخير والبركة والسلامة والسعادة من كل الجهات

علامات ليلة القدر

بالنسبة لعلامات ليلة القدر فقد وصفها النبي ﷺ بأن ليلتها لا حارة ولا باردة وان الشمس اللي بتطلع بعد فجرها بتكون بيضاء لا أشعة لها .. أما عن نبح الكلاب أو صوت الحمير هو كان كلام من بعض السلف ولكن ليس له دليل قاطع على صحته ، أما بالنسبة للفهلوة فالعبادة ليست بالفهلوة ويجب أن نتعامل بالإخلاص لله تعالى و نسأله القبول لأن الجنة مش بالفهلوة فلازم تتعب عشانها .. قال الحبيب ﷺ : "ألا إن سلعة الله غالية ، ألا إن سلعة الله الجنة".

تفسير السور القرآنية على منصة تجربة

01 - سورة الفاتحة               78 - سورة النبأ
79 - سورة النازعات             80 - سورة عبس
81 - سورة التكوير                82 - سورة الانفطار
83 - سورة المطففين         84 - سورة الانشقاق
85 - سورة البروج                86 - سورة الطارق
87 - سورة الأعلى                88 - سورة الغاشية
89 - سورة الفجر                 90 - سورة البلد
91 - سورة الشمس            92 - سورة الليل
93 - سورة الضحى               94 - سورة الشرح
95 - سورة التين                 96 - سورة العلق
98 - سورة البينة                 99 - سورة الزلزلة
100 - سورة العاديات         101 - سورة القارعة
102 - سورة التكاثر             103 - سورة العصر
104 - سورة الهُمزة            105 - سورة الفيل
106 - سورة قريش             107 - سورة الماعون
108 - سورة الكوثر              109 - سورة الكافرون
110 - سورة النصر               111 - سورة المسد
112 - سورة الإخلاص          113 - سورة الفلق
114 - سورة الناس
هل أعجبك المقال :

تعليقات

محتويات المقال