سورة النساء (1)

سورة النساء - الآية 1

سورة النساء (1)

الفيسبوك ده إختراع جميل أوى يا أخى !!
عليه كل حاجه .. رياضة تلاقي ، سياسة تلاقي ، دين تلاقي ، ضحك تلاقي وهكذا - مجبتش جديد انا عارف - وعندك بقه على الفيسبوك أبلكيشن هتلاقي فيه أوبشن إسمه "Activity Log" ده لو إنت عامله بالإنجليزي ولو إنت عامل الفيسبوك بالعربي هتلاقي إسمه "سجل النشاطات"
بيعمل ايه بقه البتاع ده ؟؟
ده بيسجل كل حركة بتعملها على الفيسبوك "يا واجعة مربربة"
أى لايك عملته ، كومنت كتبته ، صفحة عملتلها لايك ، فريند ضفته ، فريند شيلته ، بوست نزلته ، فيديو شوفته ، السيرش اللي عملته ... إلخ إلخ وليلة كبيرة أو سعتك
كمان في أوبشن إنك تطبع السجل أو الـ Log ده وكان نفذ التجربة ديه أحمد الشقيري مرة ، والطابعة فضلت تطبع كل حاجة اتعملت على الاكونت من يوم ما اتعمل لحد وقت الطباعة وعملت آلاف الأوراق "خليك فاكر النقطة ديه كويس"
طب انت ينفع تخلي حد يبص على تحركاتك ديه و بالتفاصيل الصغيرة أوي ديه من سنين فاتت لحد دلوقتي ؟؟
طب الورق اللي فيه تحركاتك على الفيسبوك ده ينفع حد يقرأه أو إنت تقرأه على الملأ
إنت أدرى بنفسك بقه يا نجم !!

ربك بيقول في بداية أول آية من سورة النساء "يا أيها الناس اتقوا ربكم" وفي ختام الآية الأولى "إن الله كان عليكم رقيبا"

تخيل الـ Log أو السجل بتاع حياتك عامل إزاي ومكتوب فيه ايه بتفاصيل التفاصيل "ربنا يسترنا"
بس الفرق بين الفيسبوك و سجل أعمال حياتك إن الفيسبوك مش هيحاسبك ولا هيعاقبك .. ده بالعكس هيعرف انت بتحب ايه و هيزودلك ظهور الحاجات اللي بتعجبك .. هو عايز يبسطك ، لكن سجل أعمالك ده فيه يا إما نجاتك يا إما هلاكك ، ربنا مش عايز يعاقبك ربنا عايز لك التوبة والعبادة كما قال تعالى "والله يريد أن يتوب عليكم" ديه بداية آية من آيات سورة النساء برضو

معلومات عن سورة النساء

سورة النساء هى سورة مدنية نزلت بعد سورة الممتحنة ، ترتيب سورة النساء فى القرآن الكريم رقم 4 ، عدد آيات سورة النساء 176 آية ، عدد كلمات سورة النساء 3745 كلمة ، عدد حروف سورة النساء 16030 حرف
يُقال عن سورة النساء فى موقع ويكيبيديا أنها من السور القرآنية السبع الطوال حيث أنها من السور المدنية الطويلة وتعتبر سورة مليئة بالأحكام التشريعية التي تنظم الشؤون الداخلية والخارجية للمسلمين ، وقد تحدثت السورة الكريمة عن أمور هامة تتعلق بالمرأة والبيت والأسرة والدولة والمجتمع

سبب تسمية سورة النساء

سُميت سورة النساء لكثرة ما ورد فيها من الأحكام التي تتعلق بهن بدرجة لم توجد في غيرها من السور ولذلك أُطلِقَ عليها "سورة النساء الكبرى" أما سورة النساء الصغرى فهي سورة الطلاق

تفسير سورة النساء

قال تعالى فى سورة النساء :
يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُمْ مِنْ نَفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيرًا وَنِسَاءً وَاتَّقُوا اللَّهَ الَّذِي تَسَاءَلُونَ بِهِ وَالْأَرْحَامَ إِنَّ اللَّهَ كَانَ عَلَيْكُمْ رَقِيبًا (1)

طب نقول معناها حتة حتة عشان الحبايب
(يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُمْ مِنْ نَفْسٍ وَاحِدَةٍ وَخَلَقَ مِنْهَا زَوْجَهَا)
أمر لكل الناس بالتقوى ومراقبة الله في الأفعال ، الله الذي خلقك من نسل سيدنا آدم وتم الإشارة له بلفظ "النفس الواحدة" ومن هذه النفس الواحدة "سيدنا آدم" خلق زوجته حواء لأن حواء خُلقت من ضلع آدم

(وَبَثَّ مِنْهُمَا رِجَالًا كَثِيرًا وَنِسَاءً)
و نشر من نسل آدم و حواء رجال كثير ونساء إلى قيام الساعة

(وَاتَّقُوا اللَّهَ الَّذِي تَسَاءَلُونَ بِهِ وَالْأَرْحَامَ)
هنا أمرين من الله تعالى :
الأول : أن تتقي الله اللي بتسأل بيه ، بمعنى لما تيجي تطلب من حد حاجه تقوله أسألك بالله أن تفعل كذا أو بالله عليك تعمل كذا
الثاني : إتقوا الله في الأرحام و صلتها و عدم قطعها

(إِنَّ اللَّهَ كَانَ عَلَيْكُمْ رَقِيبًا)
لو تيقنت في قلبك ان الله عليك رقيب .. هتطلع بأمرين مهمين جداً :
الأول : العلم
فهو معرفة العبد بأن الله مطلع عليه ، ناظر إليه يرى جميع أعماله ، ويسمع جميع أقواله ، ويعلم بكل ما يخطر على باله
الثاني : صلاح الحال
أما تبقى تراقب الله في أفعالك هتوصل لمرحلة الحياء من الله و ترك المعاصي والاجتهاد في الطاعات
** طب لما نحقق الشرطين اللي فوق دول هنحصل على ثمرتين :
الثمرة الأولى : المشاهدة
و ديه للمقربين .. و دول أعلى درجة من المؤمنين و هنا يعبد الله كأنه يراه "ربنا يجعلنا من المقربين"
الثمرة التانية : ثمرة الحياء
تستحي من الله و تتكسف انك تعصاه لإنك متيقن من أنه يراك و ده تحقيق لقول النبي صلى الله عليه وسلم "أن تعبد الله كأنك تراه فإن لم تكن تراه فإنه يراك"

يا راجل ده مديرك لو جه قعد عندك في المكتب يوم واحد .. بتفضل ثابت على مكتبك و بتحاول تبين انك شغال و مفيش وقت فاضي عندك و بتجتهد قدامه على قد ما تقدر عشان مديرك ما يحسش انك مقصر
طب و ربنا ؟؟ اللي خلق مديرك وفي إيده مصيرك و مصير مديرك "دنيا وآخرة" !!