سورة النساء (2)

سورة النساء - الآية 2 ، 3

سورة النساء (2)

زمان عند العرب كان لما الراجل بيموت كان ميراثه بيتوزع على الرجال اللي بيحاربوا بس ، يعني مش أي رجالة كمان ، والأطفال ملهمش في الميراث ولا النساء كمان ، وكمان كانوا بيورثوا الزوجات و ياخدوها ضمن التركة اللي بتتوزع زيها زي الماشية "أعاذكم الله"
طب ده في الجاهلية يا عمنا مالنا و مالهم دلوقتي .. هقولك .. دلوقتي أكل مال اليتيم بقه موجود بس بشكل مختلف ؟!

** الأب مات .. يبدأ يحصل الآتي مع الزوجة الأرملة :
ملكيش ورث ولا ليكي ولا لعيالك إلا لما تتجوزي أخوه .. سلو بلدنا كده !!
عايزة تاخدي الميراث و تتجوزي بيه راجل غريب "أه يا فاجرة" !!
مال ابننا ميطلعش بره "بيحبوا ابنهم أوي يا حرام" !!
و ملكيش وصاية على العيال .. الوصي هيبقى عمهم / جدهم كده يعني !!

** و أكل مال العيال بقه في أشكال كتير .. يعني لو الورث بيت مثلاً :
تلاقي الوصي ياخد شقة غير اللي قاعد فيها (ماهو مفيش حد هيقف له) !!
ويقولك ديه شقتي بس كنت سايب أبويا أو أخويا قاعد فيها شفقة .. حتى إسألوه "ما هو مات خلاص هنسأله حاضر" !!
لو عنده غنم أو ماشية يقوم يبدل بينهم و ياخد الماشية النضيفة لنفسه و يسيب للأيتام الماشية المريضة ويقول ما كلهم بقر .. ده لو ساب لهم حاجة أساساً !!
ده في أنيل من كده .. تلاقي وقت توزيع الميراث يظهر ورق إن الميت مديون و يطلع الورثة ملط والورق موجود وأثبتوا العكس "هي ديه صلة الرحم" !!

كل ده عشان في ناس بتحلل لنفسها مال اليتيم ويقولك ما ده مال أبويا أصلاً وأنا أولى بيه منهم أو خير أخويا أحسن ما ياخدوا غريب

** كمان بقه البنت اليتيمة ديه مصيبة سودة تانية في مجتمعنا للأسف :
وقت الجواز تلاقي العريس و أهله يبيعوا ويشتروا و كفاية انك يتيمة و هنكسب فيكي ثواب
ده غير الإهانة بكل أشكالها بعد الجواز و ده عشان مالهاش أب يقف معاها

الأشكال ديه ربنا رد عليهم فى الآية الثانية في سورة النساء

تكملة تفسير سورة النساء

قال تعالى فى سورة النساء :
وَآتُوا الْيَتَامَى أَمْوَالَهُمْ وَلَا تَتَبَدَّلُوا الْخَبِيثَ بِالطَّيِّبِ وَلَا تَأْكُلُوا أَمْوَالَهُمْ إِلَى أَمْوَالِكُمْ إِنَّهُ كَانَ حُوبًا كَبِيرًا (2)

(وَآتُوا الْيَتَامَى أَمْوَالَهُمْ)
يعني أموالهم كلها مش حتة منها او مش تاخدوها لنفسكم

(وَلَا تَتَبَدَّلُوا الْخَبِيثَ بِالطَّيِّبِ)
يعني متاخدش الحلو اللي في الميراث لنفسك و تسيب لهم الشقة الضيقة أو الماشية العيانة .. إلخ

(وَلَا تَأْكُلُوا أَمْوَالَهُمْ إِلَى أَمْوَالِكُمْ)
يعني متاخدش أموالهم و تحطها على مالك و تقولهم هنعمل غديوة "غديوة مين يا لص"

(إنَّهُ كَانَ حُوبًا كَبِيرًا)
حوباً يعني ذنب كبير

وَإِنْ خِفْتُمْ أَلَّا تُقْسِطُوا فِي الْيَتَامَى فَانْكِحُوا مَا طَابَ لَكُمْ مِنَ النِّسَاءِ مَثْنَى وَثُلَاثَ وَرُبَاعَ فَإِنْ خِفْتُمْ أَلَّا تَعْدِلُوا فَوَاحِدَةً أَوْ مَا مَلَكَتْ أَيْمَانُكُمْ ذَلِكَ أَدْنَى أَلَّا تَعُولُوا (3)

(وَإِنْ خِفْتُمْ أَلَّا تُقْسِطُوا فِي الْيَتَامَى)
يعني لو خفتم تعطوا البنات اليتامى حقوقهم في الجواز زيها زي باقي البنات يبقى بلاش منها الجوازة ديه و إتجوز براحتك من باقي النساء 2 و 3 و 4 زوجات كمان لو تقدر و ملكش دعوة باليتيمة ، يارب نكون فهمنا الحتة ديه عشان الرجالة مش حافظين غير العدد و خلاص ، والشرع حدد أخرك في التعدد 4 زوجات عشان في الجاهلية كانوا بيوصلوا 10 زوجات

(فَإِنْ خِفْتُمْ أَلَّا تَعْدِلُوا فَوَاحِدَةً)
يعني شرط عليك إنك تعدل بين الزوجات لو عددت ، فلو خايف إنك مش هتعرف تعدل بينهم يبقى زوجة واحدة ، و ما ملكت يمينك من جواري .. "راح زمن الجواري ما تركزش"

(ذَلِكَ أَدْنَى أَلَّا تَعُولُوا)
أن ذلك أقرب إلى أن لا تعولوا ، ومعنى تعولوا : تميلوا لزوجة عن الأخرى ، وفي قول تاني أنه حتى لا يكثر عيالكم و تبقى متبهدل ما بين الزوجات والعيال